「元朗系列」恐怖體驗 牛極 屍體般的上檯牛扒

以我所知依家元朗有三間熱石牛，

今次就試試最新位處於雞地呢一間，牛極。

門口自己先購票，我地試新店通常都叫一個最貴一個最平去試下。

不過老闆唔知點解今次突然話要試左最平果兩個先，真好係好彩。

一樣都係食牛扒包埋任食飯，沙律吧，同湯。

。

其中我都幾期待個湯，因為有一間個紅湯真係做得好好，

但係我一打開呢煲湯我完全唔想落手去裝湯，

不過第一次試就比個機會佢，

仆街，淡到有水喉水味。

咩事可以去到咁ga呢？

沙律我已經唔想講，又係有水喉水味。

坐底望向檯面會有三支調味料，

其實係幾好ga，感覺起碼衛生些少。

重有個溫馨提示

話牛扒會一成熟上檯。

我老闆個牛肩排到先。

打開張紙巾，個樣好恐怖，佢地究竟知唔知乜野係一成熟？

最好笑係食落去個牛肩扒係好咸，係由入面咸出黎。

即係個牛扒係已經預先有醃過，

點解要醃呢？食開肉GA人就會知係舊肉有問題。

牛肉有預先醃過，但係食落去超級軟。

我真係唔知佢用左D乜野去加工喇。

到我個澳洲肉眼扒到喇。

一打開果下，我打左個突再X左出黎。

哇，呢舊乜野黎？

腐屍咁樣樣皮都夠膽拎出黎賣，

再問多一次佢地知唔知乜野叫一成熟。

唔那係一係生勾勾ga肉放上檯面呀！！！

肉質同肉味都係超級差，

我唔識講喇。

依餐比舊牛都嚇飽。

後記：元朗食晒三間，呢一間我諗都唔太會回頭，因為始終有更好選擇。

「屯門系列」漢堡博士 Dr.Burger 性價比高 用心做包

虹橋附近做完野，

一心諗住去BYOB 食返個意粉，

點知完來我地來得太晏，落左場。

咁食咩好呢？

又唔想食拉麵，望望下就見到對角位有一間細細間食店，

係漢堡包店，個店主著到成個大廚咁。

望望下其實都好多選擇，同我老闆商量緊食邊個好時，

就聽到店主把聲，不如試下個龍蝦包丫，

今日有靚龍蝦返到貨呀。

餐牌上面冇，咁就問佢係乜野價錢，

＄188，我地覺得都可以一試，

咁老闆就決定左喇，

咁我自己又食邊個好呢，

再黎多個推介，

試下我個麻辣鴨腿包丫，

又好似幾得意禾，

重有得加錢有野飲同多個小食，

店主開始煮，佢真係成隻龍蝦拎比我地睇。

話咁快原隻龍蝦包就出爐喇，

連個蝦頭都起乾淨晒，

蝦膏都放埋入包度。

整得岩岩好，啖啖蝦肉，

如果龍蝦愛好者絕對可以一試！

再黎我個麻辣鴨腿包，

我個小食叫左炸雞，

個份量多到豪大大一份炸雞咁多，

呢個小食好抵！

食到一半先記得自己未影個薯寶。

總體黎講，

好食，可以再回頭再回頭，

連個包都係店主特登揀過，

食落係心機。

「元朗系列」寶石餐廳 食肉獸必吃鐵板扒餐

今日我要食肉肉呀！！！

我生酮左一段時間啦，好多野都唔食得老闆都好遷就我，

主要其實我係食油脂，不過最近變左好似食肉太多，

（如果食肉多就變左蛋白質過高）

但係我今日堅想食肉，但唔係想食高級果種。

類似花園餐廳，元朗安娜果類我就ok。

咁諗來諗去睇下元朗有冇新餐廳又類似，

就醒起呢間寶石餐廳喇。

鐵板，大大舊肉。

泊車就後面萬金中心大把位都係＄16蚊一個鐘。

我地一放假就HEA到好夜先出街，所以入到寶石餐廳都成9點幾10點喇。

唔需要等位，入面坐左三分一人。

落好單黎個紅湯，咁夜都唔會水汪汪溝過水，非常好。

我自己叫左個雜扒餐，我有少少打個突係珍寶腸開左半，

其中我想食條腸先叫呢個餐，哈哈

味道都係想像中咁，平價鐵板餐味道。

我老闆叫左個牛柳，我又隔壁飯香喇，

成日都覺得佢果塊係好食D。

同行重有一位朋友仔，

我已經唔記得左佢叫係乜野餐喇。

呢間餐廳如果元朗食厭左安娜都可以係第二個選擇，

食肉獸幫趁就一流，

真係大大份，男仔就一定食得飽。

女仔應該會食唔晒。

「元朗系列」龍鳳店 最強勁蛋治蛋控必食

做完野肚仔餓揾食時間，

車左個客落元朗先至六點幾，

時間重早天又未黑唔想食晚餐，

我地兩個蛋精就碌左去呢度食蛋治，

之前返學經過淨係識食三重芝士同吞拿魚蛋治，

我老闆話識食一定係食鵝肝蛋治，

另外再叫多份鰻魚蛋治，

呢度個蛋唔係夾入包咁行貨，

有圖你睇瀑布式堆到成座山咁，

唔講以為係蛋包飯，其實係蛋包治，

重有出名樽裝系列，奶茶咖啡都沖得好飲，

生酮ga我唯有破戒啦！

下面呢個係鵝肝蛋治

再黎就係鰻魚蛋治，面頭會落小小鰻魚醬

同埋紫菜粉

飲左個走糖奶啡

鋪面放置左一幅百爵茶盒做磚的牆

以下都係餐牌同價錢

價錢方面其實唔算平，

但係唔知點解總係會想走黎食，

店面方面佢只係有一張摺檯坐就一定唔舒服。

不過咁我地都食左好多次喇，哈哈

「元朗系列」滷頂 元朗最好食滷肉飯控肉飯

其實我唔係太知間野開左好耐，

通常外賣店我都多數係幫趁炸雞，

飯好少會咁樣買完企響街度食。

今次呢間都係老闆帶我黎。

門面其實我覺得好日式，

成間鋪得門口兩張檯，一係就企響度食。

香港多數都只係見到滷肉飯，我冇乜見過有控肉。

雖然比酸菜遮住左d，

我又影左得衰左D，

但係食落口果一下，

嗯！係台灣味道呀，

食落去會粘口架，

好味呀，呢個我ok！可以翻頭食翻頭食！

另外我地都有叫到台灣腸，

因為咁岩果日特價，買一送一。

都係現成腸仔。

後記：

我覺得呢一間其實要開大間D，好似二悅咁開偏遠位國都會有人射登去食。

反面咁樣外賣，夏天真係好難搞，

最好佢就有外賣仔送，不過我見佢好似冇join food panda

「屯門系列」帝樂 - 德國餐廳 King Ludwig Beerhall 泊車方便 坐位舒適

老闆早個幾兩個星期就話搵日同媽咪食飯，

個母親節飯同生日飯合併一齊食，

咁好啦講講下就冇左回事，

突然老闆醒起好似今日話係約左食飯，

問佢地突然又話全部人都話ok，

忽然之間Book 邊間食好呢，

好歹都5位食，walk in 通常都冇位。

伯友又話想食西餐，

咁兩餐夾埋食又冇理由是但 ，

諗諗下有一間好似好耐冇去響洪水橋又泊到車（呢個先係至緊要），

打去有位咁就去馬啦，其實私心係想食豬手😆。

首先叫左個大西蘭花湯：

中間有個用酸忌廉打成ga mouss，飲落去好輕身。

再黎一個大紙船小食拼盤：

有炸蝦，雞翼，腸，大堆薯條響底

配左兩種醬

咁食德國菜出左名都係食腸仔

腸仔拼盤:

我目標想食的豬手：

侍應會好識做咁成隻比我地相機食左先，

再會去旁邊細檯幫我地碎左佢。

食落去面皮係脆，內裡夠味。

以下幾樣就唔特別講了。

最後上居然係咖哩農夫包，

大家都飽晒時上呢個。。。。

反而伯友最欣賞係呢個包包，面頭炸蝦黎，

包吸左汁軟硬度剛剛好，味道都剛剛好，唔會因為比包吸左汁而變淡。

後記：

環境呢間餐廳其實元朗屯門都少有，

泊車，LIVE BAND 氣氛都好，

食物質素都唔會脫軌，咁多年都重保持到。

「元朗系列」二悅 精品台灣牛肉麵

本來落元朗本來想食吉列牛定食，

點知去到就開始落大雨，

行到門口先見到冇開就試試隔離呢間台灣牛肉麵，

賣相擺盤都靚，打卡一流

我地兩個都叫左紅燒牛肉麵，

湯是用茶壺分開上，

因為店主介紹咁樣可以試到幾種食法

1.淨係飲個湯

2.淨係試下麵，麵底已經有調味

3.想食濃味可以沾麵咁食

4.鐘意湯麵就落晒去麵度就ok

牛肉淋身但係唔夠入味，

淆多陣入味d會好d, 同偏乾身。

食食下我叮一聲覺得食落去個肉質咁似我最近新歡壓力煮出黎咁？

我一講出黎老闆就抬頭望向開放式廚房，

就同我講有一堆電子壓力煲放左響上面櫃。

哈哈，我都係食返我牛肉麵

另外重有叫左個台灣腸，

都係現成貨色，冇乜特別，。

後記：

雖然間店細細，但坐得都舒服唔覺迫，

有種坐緊響cafe 食麵感覺。

野食方面擺盤的確係精美，

不過我同老闆都認同返轉頭食ga機會唔大家，

因此元朗實在有太多間台灣麵食出食店家。

「元朗系列」屏山老地方 漢堡扒咁大塊肉餅

我地條team最近買左架同事用ga睇樓專用車
(係呀，自費架，油錢都係自己出架，D閪客成日以為公司有津貼)

咁新落地就自然想成日渣先安樂，

我個同事就問Lunch去邊食好，

咁渣車去遠D我地就由屯門過左去屏山食喇，

一班食肉獸梗係去食個肉餅飯。

泊車又方便，依家入些少有幾個專用位係for老地方泊車。

唔洗泊路邊有人睇抄牌，食食下又要渣走架車，

食都食得唔安樂。

一坐底睇下個今日推介。

umm....

睇返餐牌

都係有圖吸引d

一望就望到個六重芝士煎肉餅飯。

我老闆就叫左個松露芝士牛肝菌煎肉餅飯。

咁我行生酮都係叫走飯淨係食菜芯。

一黎到老闆見到我個肉餅老闆就嘩嘩聲，

好香呀，芝士味好勁呀，

基於隔離飯香呢個道理佢就成日覺得我果個好食D。

老闆個飯黎到我又覺得佢果個飯香過我果個😂

牛肝菌同黑松露味道都好濃，

我地其實係share 左一半個肉餅交換食。

滿足晒大家響願望😘

後記:

我食果個六重芝士真係好重口味，

好似我呢D芝士迷一定唔可以錯過，

車打同水牛芝士味道夾埋本來就已經冇得輸，

巴馬臣芝士應該都有落帶些少咸香。

老闆個肉餅芝士味就唔係好覺，

黑松露同牛肝菌味道實在太濃，

好多味道都蓋過晒，

不過兩款都係好食都係重口味必選。