一喜‧燒肉 屯門

 本來打算同老闆去食個車仔麵頂下肚就算

點知佢原來心心念念想烤肉又唔出聲

要人地估一大餐先至講

咁食烤肉就梗係食任食啦

叫定食一碟邊度夠喉

但係又唔想食到成千蚊落樓

就諗起一年前曾經黎過呢間燒肉食下午茶放題當時係$178 

不過我地黎到都晚飯時間

所以都預左$300 左右一個人頭

去到門口望下 發現佢有款肉做特價放題

晚市快閃:封門柳放題

$208

就呢個啦

其實唔係淨係封門柳可能食GA

重有另外三款牛

同豬,雞可能燒

不過封門柳就最有牛味

根據經理同我地吹水時講

全隻牛只有一條，緊貼着橫膈膜，此肉與內臟較接近，脂肪不多但肉味濃

所以呢個特價烤肉PLAN係好抵食架,咁

佢黎食幾款一齊上

唔知邊隻打邊隻

最後我地試左每款叫一次就知道個分別

真係封門柳最有牛味一食就食得出

呢個關東煮都可以一試

有小小炸物同埋湯同埋蔬菜可以自取

我最鐘意呢間佢好多沙律同生菜

我最常用黎配肉食

夾小小泡菜黎食又有另一番風味

飲品選擇都足夠

重有低咖啡因冷萃咖啡呢個好飲

雪糕就係基本款式冇特別去試

我地兩個人埋單,加埋一,都只係$500 

爽歪歪

重平過打邊爐

最緊要任食冇煩惱唔洗就黎就去

如果冇要求想再平d佢個下午茶優惠都依然響度

重要下午兩點食到五點添

我老闆又依依哦哦

話早知早d起身啦

咁下次再黎啦

「嘗新系列」麥當勞18件麥樂雞 新醬 南乳 咸蛋黃

麥當勞每年都會有幾次18件麥樂雞推出，

麥樂雞食ga唔係雞，係食佢個醬。

所以每次都會有新意思搞出黎。

今次帶黎左三隻新醬。

左起：

蜜糖芥末

幾乎每次都有出呢隻味，我亦都覺自甜酸醬之後最好食呢隻醬。

香草檸檬

呢隻都係今次新醬，口味清新，可以平衡返打後兩隻醬的重口感。

南乳

重口味之列！好南乳，醬身好厚，食落去都creamy，係會食落留香果種。

咸蛋黃

食落去第一啖唔係好feel到咸蛋，跟住再落第二啖就開始出到味道，
因為今次呢個醬係焦點的確味道方面係似，但係我都覺得係南乳醬好食D。

最後都有呢個鐵板牛扒shake shake 粉，

個味超級似，超級鐵板！

絕對可以一試。

「屯門系列」牛皇莫 鮮牛肉 超好味牛腩

又係公司每月飯局，

今次去我聽左好耐但係一直都未去過ga牛皇莫，

話說間餐廳位於蝴蝶村冬菇亭，

望落去同一般火鍋食店好似冇咩分別，

不過如果有去過蝴蝶村街市買餸可能就會幫襯過。

一入街市望埋去最大果間肉檔就係牛皇莫的。

佢自己標榜係牛肉批發商，所以牛肉就一定會係靚牛。

由於我地有幾位都係熟客黎，

一坐底落單我都聽唔切佢落左乜，

跟住等左一陣就開始有野送上黎。

等緊食時就望下佢餐牌都好得意，

寫到牛肉專家添XD，

第一道居然係象拔蚌刺身，

食落爽口鮮甜，足足夠我地十個人食。

第二道係牛腩，亦都係其中一道招牌，叫得專家又係招牌，真係堅好食。

如果有碗飯就一流，肉質，牛味都正！

再黎就係打邊爐牛肉，呢個我唔識叫，

因為係由店主發板今日重有邊個位置靚就出果幾part，

又係牛肉濃，食落新鮮。

後記：雖然呢間係位於菇亭，但佢一定唔係食平價，係食質素之選。

服務方面我唔知點評價，因為係熟客服務。

環境我地亦都係開左間獨立房，一定係坐得舒服。

重有係佢有賣牛腩但係冇粉麵檔果一種好難聞味道，感覺乾淨企理。

所以唔係公司飯局自己食都再返轉頭。

「屯門系列」稻成小館 一般甚至差 不回頭系列

老闆今日唔知抽起邊條筋好想食砂鍋雲吞雞，

就醒起有一次行過市廣場間牛角附近係有一間食呢類野，

稻成小館，

果次重要行過望到佢廣告主力都係sell 呢樣野食，

咁就去試下啦，

我地差不多9點去食，

見個場都係滿人，但係咁岩有檯走我地就唔洗等位，

不過就好搞笑，屯門9點其實已經過晒繁忙時間，

帶位侍應重要分開一張四人檯變做兩人檯，

最後有一位類似經理的將張檯拍返埋。

咁夜我地都唔想食太多野，

叫左個砂鍋雲吞雞，辣子雞，高力豆沙三樣。

第一道：砂鍋雞，一睇色水就知唔夠濃，飲落係味雞麵粉水。

第二道：辣子雞，我嬲到唔記得左影喇已經，雞粒同宮保雞丁一樣

第三道：高力豆沙，食落其實冇乜野，不過不失，但係都話左間野服務差，我地等左足足半個鐘有多都，原來最後比左隔離檯食埋就入左我地單。


最後: 差到我地都認同唔會再伏呢間咁ga野！

「屯門系列」Bugis@叻沙・海南雞飯 連鎖但有水準的肉骨茶店

今日又開完會，超級肚餓，

老闆帶住我二話不說去左最就近呢一間店，

不過就咁岩Lunch time 需要些少時間排隊

我自己就未食過，但老闆咁嘴刁都話ok，

咁應該就唔會差得去邊。

等位時睇下個午市餐牌，

如果照Vcity各餐廳黎計，價錢已經唔算貴，

但係計屯門黎講就係貴喇。

重有其他類型野食，

不過我一心想食肉骨茶，就叫左個午餐。

賣相色水幾好，

而且料都充足，

香港食肉骨茶，好多時候係湯頭太稀，

如果就咁飲就夠味，

我生酮唔食得飯就咁飲就岩岩好。

但係肉骨茶係用黎撈飯，咁樣就變左又唔夠味道喇。

老闆因為撈飯食就出現左咁GA情況喇。

即係個湯要再濃D先可以喇。

以連鎖店黎講係合格啦。


小食我地就另外叫左個雞翼。

個雞翼係單骨，即係一隻雞翼都要一開二咁賣😂，

喂呀，果然係連鎖。。。。

最後搭檯關係，我地望到隔壁位叫海南雞飯好似唔錯，

等我下次叫黎試下先再打多篇啦。

「屯門系列」Mos Burger新搞作摩斯芝辣漢堡

自從由元朗過左黎屯門返工之後，

我先至發現屯門真係美食沙漠黎架大佬，

又劣又貴食物真係超級多，

特別係屯市中心一帶ga 地方，

搞到我依家食來食去都係果幾間，

而我其中一間最常食ga 就係MOS Burger。

以前我未生酮基本上都係食黑醋雞漢堡，

依家改左都只係食摩斯雙層芝士漢堡，

可以比我走包之外都叫做有d野食下。

今日去食時發現左有個新包出現左

摩斯芝辣漢堡！！

我初頭以為係個醬辣，

其實係加左有煮過ga 青辣椒夾響入面，

咬到青椒先會覺得辣，

咬唔到果啖就其實同食普通芝士漢堡一樣，

叫做多一種口味可以選擇。

因為我生酮，所以我食包要飛包，

呢個係我呢最常叫法，

我就會跟沙律同咖啡，

我老闆就鐘意食佢呢隻薯條，

最後想講下，

唔知餈時開始佢呢隻沙律醬之前我好鐘意食，

依家佢轉左新包裝，

一返轉睇，簡體黎ga。。。。

之後我就連醬都冇食，淨係食沙律菜。

「屯門系列」火水爐午餐食花膠肉餅飯

今日lunch唔想諗食咩好就走左去鋪頭後面是但食，

咁我鋪頭後面得茶餐廳，米線，雞扒，

唔係禾，有間野開左冇幾耐，

火水爐，我一路以為佢淨係晚市打邊爐先改個咁ga名，

原來佢下午時段主要係賣花膠粉麵飯。

一睇到有飯食我老闆就會話好呀，可以丫。

呢間餐廳都可以講得上係算食裝修，

入面係行5060年代許冠文風格，

門面有幅好似以前戲院門口廣告咁ga畫。

檯都都係大圓檯多，

好彩佢唔係玩摺櫈，

如果唔係就真係好似練功咁坐都屎忽都痛埋。

我就因為行低碳叫左個花膠雲吞雞湯，

我食唔出係什麼膠黎，唔知係咪煮法問題，感覺似食緊魚肚。

雲和就可以，入面係蝦多過肉，彈牙的。

湯就大路野唔係燉湯底。

我老闆就唔知點解好想食飯就試下佢個蒸肉餅飯。

黎到個樣我地唔知點解有少少打左個凸，

我影出黎好似好大兜其實我地打個凸係因為睇落去咁細咁ga？

老闆就話食落去味道可以，

但就係真係太細份就，連我個雀仔胃老闆都餵唔飽，

同檯其實重有我d同事，望落佢食果個雞脾飯好似幾好。

不過我就冇影底喇。

下次應該會想試下佢打邊爐，

因為我有時放工經過望到佢地真係有個好似火水爐咁ga野放響檯面，

件事好似好有feel禾。


後記：

lunch份量比較細，可能連女仔食都係岩岩夠飽。

味道方面偏濃味，花膠口感偏向似魚肚，

湯飲落冇粘口感，雲吞食落彈牙多蝦肉。