「元朗系列」恐怖體驗 牛極 屍體般的上檯牛扒

以我所知依家元朗有三間熱石牛，

今次就試試最新位處於雞地呢一間，牛極。

門口自己先購票，我地試新店通常都叫一個最貴一個最平去試下。

不過老闆唔知點解今次突然話要試左最平果兩個先，真好係好彩。

一樣都係食牛扒包埋任食飯，沙律吧，同湯。

。

其中我都幾期待個湯，因為有一間個紅湯真係做得好好，

但係我一打開呢煲湯我完全唔想落手去裝湯，

不過第一次試就比個機會佢，

仆街，淡到有水喉水味。

咩事可以去到咁ga呢？

沙律我已經唔想講，又係有水喉水味。

坐底望向檯面會有三支調味料，

其實係幾好ga，感覺起碼衛生些少。

重有個溫馨提示

話牛扒會一成熟上檯。

我老闆個牛肩排到先。

打開張紙巾，個樣好恐怖，佢地究竟知唔知乜野係一成熟？

最好笑係食落去個牛肩扒係好咸，係由入面咸出黎。

即係個牛扒係已經預先有醃過，

點解要醃呢？食開肉GA人就會知係舊肉有問題。

牛肉有預先醃過，但係食落去超級軟。

我真係唔知佢用左D乜野去加工喇。

到我個澳洲肉眼扒到喇。

一打開果下，我打左個突再X左出黎。

哇，呢舊乜野黎？

腐屍咁樣樣皮都夠膽拎出黎賣，

再問多一次佢地知唔知乜野叫一成熟。

唔那係一係生勾勾ga肉放上檯面呀！！！

肉質同肉味都係超級差，

我唔識講喇。

依餐比舊牛都嚇飽。

後記：元朗食晒三間，呢一間我諗都唔太會回頭，因為始終有更好選擇。

開箱連試用 Vitantonio 300ML 無線便攜攪拌杯

買呢個杯我爭扎左好耐，

因為生酮之後我就戒左食水果，

就唔需要打果汁，

咁我買黎唯一用途就係打健身蛋白粉，

但係我又覺得同手持式攪拌重覆左用途就一路hold住，

最後就因為想響公司下午打粉飲，

一支箭走左去屯門個專門店比錢。

個盒就好粉紅色，實物就覺得偏紫同暗沉，

容量方面 300ML，岩岩好可以打一杯粉，

說明書上面講，水溫唔可以超過40度，咁即係唔可以入洗碗機。

不過我放公司用都係手洗影響唔大。

紙盒上面有簡單說明，

開著左個杯是要反轉先攪拌到，

碎冰是可以的，不過唔可以大量，

跟機的說明書都有幾個果汁食譜係要加冰。

容易清洗，

全個杯連機都是防水。

充電方面接頭是USB，所以用充電寶，車充，接三腳插都可以。

黎一個近鏡，呢個明明就係紫色😓

蓋同機身各有一點，係磁性感應，對正先可以著機。

攪拌機摩打係連蓋位，

說明書上面都講，成組都擁有IPX5防水，

即係可以沖洗，但唔可以浸洗。

介紹左咁耐，開打！！！

聲音方面我覺得可以接受，

如果響一個好寧願環境就會覺得有少少嘈。

公司有茶水間用呢個係冇問題的。

用＄298 買佢就係為左打蛋白粉呢個混合完美口感

上面層泡好奶昔。

如果用黎打果汁應該係完全冇難度，

我下次有機會打果汁就拍底再share。

第一次開封，又係因為蛋白粉先至買就梗係打呢個先。

每一次都會自動打40秒就停，

亦都好似一般摩打產品咁唔好連續用太長時間。

因為會好易過熱燒機。

佢個充電方法係用磁吸式，

一放埋去就可以吸住，

未滿電時會係紅燈，

充滿之後會變成白色燈。

如果由零開始充會係2小時完成，

每次充滿都可以打大約10次，

（每次40秒計算）

最後：

我覺得佢出得遲，

我亦都買得遲

如果響公司一早買左，

咁就可以響公司飲蛋白粉唔洗餓到收工返屋企喇。

「屯門系列」漢堡博士 Dr.Burger 性價比高 用心做包

虹橋附近做完野，

一心諗住去BYOB 食返個意粉，

點知完來我地來得太晏，落左場。

咁食咩好呢？

又唔想食拉麵，望望下就見到對角位有一間細細間食店，

係漢堡包店，個店主著到成個大廚咁。

望望下其實都好多選擇，同我老闆商量緊食邊個好時，

就聽到店主把聲，不如試下個龍蝦包丫，

今日有靚龍蝦返到貨呀。

餐牌上面冇，咁就問佢係乜野價錢，

＄188，我地覺得都可以一試，

咁老闆就決定左喇，

咁我自己又食邊個好呢，

再黎多個推介，

試下我個麻辣鴨腿包丫，

又好似幾得意禾，

重有得加錢有野飲同多個小食，

店主開始煮，佢真係成隻龍蝦拎比我地睇。

話咁快原隻龍蝦包就出爐喇，

連個蝦頭都起乾淨晒，

蝦膏都放埋入包度。

整得岩岩好，啖啖蝦肉，

如果龍蝦愛好者絕對可以一試！

再黎我個麻辣鴨腿包，

我個小食叫左炸雞，

個份量多到豪大大一份炸雞咁多，

呢個小食好抵！

食到一半先記得自己未影個薯寶。

總體黎講，

好食，可以再回頭再回頭，

連個包都係店主特登揀過，

食落係心機。

「嘗新系列」麥當勞18件麥樂雞 新醬 南乳 咸蛋黃

麥當勞每年都會有幾次18件麥樂雞推出，

麥樂雞食ga唔係雞，係食佢個醬。

所以每次都會有新意思搞出黎。

今次帶黎左三隻新醬。

左起：

蜜糖芥末

幾乎每次都有出呢隻味，我亦都覺自甜酸醬之後最好食呢隻醬。

香草檸檬

呢隻都係今次新醬，口味清新，可以平衡返打後兩隻醬的重口感。

南乳

重口味之列！好南乳，醬身好厚，食落去都creamy，係會食落留香果種。

咸蛋黃

食落去第一啖唔係好feel到咸蛋，跟住再落第二啖就開始出到味道，
因為今次呢個醬係焦點的確味道方面係似，但係我都覺得係南乳醬好食D。

最後都有呢個鐵板牛扒shake shake 粉，

個味超級似，超級鐵板！

絕對可以一試。

「荃灣系列」團 日式拉麵 湯底可以 配料

抽起條筋今日想食拉麵，

響openrice搵下，見呢一間最近我地位置就試下，

一去到門口就見到呢一架自助式落單機。

如果唔明點落單其實有個職員好快咁衝出黎問你識唔識有冇野要幫手，

又介紹下邊一隻好食咁。

我就叫左櫻花蝦拉麵，再加多舊叉燒。

老闆就叫左豬骨湯，都係加左叉燒。

賣相唔差，

配料都充足，

食拉麵最緊要個湯，

濃淡度適中，

麵質佢都有幾款可以選擇。

整體方面我覺得唔錯，

如果諗唔到食咩是但食都可以，

起碼唔會覺得浪費左自己食野GA胃容量先，

但係又唔會去到好好食呀！！！呢個程度。

起碼冇我食開果幾間咁有一種隔左好耐冇食，

好想食呀ga感覺先。

「屯門系列」牛皇莫 鮮牛肉 超好味牛腩

又係公司每月飯局，

今次去我聽左好耐但係一直都未去過ga牛皇莫，

話說間餐廳位於蝴蝶村冬菇亭，

望落去同一般火鍋食店好似冇咩分別，

不過如果有去過蝴蝶村街市買餸可能就會幫襯過。

一入街市望埋去最大果間肉檔就係牛皇莫的。

佢自己標榜係牛肉批發商，所以牛肉就一定會係靚牛。

由於我地有幾位都係熟客黎，

一坐底落單我都聽唔切佢落左乜，

跟住等左一陣就開始有野送上黎。

等緊食時就望下佢餐牌都好得意，

寫到牛肉專家添XD，

第一道居然係象拔蚌刺身，

食落爽口鮮甜，足足夠我地十個人食。

第二道係牛腩，亦都係其中一道招牌，叫得專家又係招牌，真係堅好食。

如果有碗飯就一流，肉質，牛味都正！

再黎就係打邊爐牛肉，呢個我唔識叫，

因為係由店主發板今日重有邊個位置靚就出果幾part，

又係牛肉濃，食落新鮮。

後記：雖然呢間係位於菇亭，但佢一定唔係食平價，係食質素之選。

服務方面我唔知點評價，因為係熟客服務。

環境我地亦都係開左間獨立房，一定係坐得舒服。

重有係佢有賣牛腩但係冇粉麵檔果一種好難聞味道，感覺乾淨企理。

所以唔係公司飯局自己食都再返轉頭。

「元朗系列」寶石餐廳 食肉獸必吃鐵板扒餐

今日我要食肉肉呀！！！

我生酮左一段時間啦，好多野都唔食得老闆都好遷就我，

主要其實我係食油脂，不過最近變左好似食肉太多，

（如果食肉多就變左蛋白質過高）

但係我今日堅想食肉，但唔係想食高級果種。

類似花園餐廳，元朗安娜果類我就ok。

咁諗來諗去睇下元朗有冇新餐廳又類似，

就醒起呢間寶石餐廳喇。

鐵板，大大舊肉。

泊車就後面萬金中心大把位都係＄16蚊一個鐘。

我地一放假就HEA到好夜先出街，所以入到寶石餐廳都成9點幾10點喇。

唔需要等位，入面坐左三分一人。

落好單黎個紅湯，咁夜都唔會水汪汪溝過水，非常好。

我自己叫左個雜扒餐，我有少少打個突係珍寶腸開左半，

其中我想食條腸先叫呢個餐，哈哈

味道都係想像中咁，平價鐵板餐味道。

我老闆叫左個牛柳，我又隔壁飯香喇，

成日都覺得佢果塊係好食D。

同行重有一位朋友仔，

我已經唔記得左佢叫係乜野餐喇。

呢間餐廳如果元朗食厭左安娜都可以係第二個選擇，

食肉獸幫趁就一流，

真係大大份，男仔就一定食得飽。

女仔應該會食唔晒。

「屯門系列」稻成小館 一般甚至差 不回頭系列

老闆今日唔知抽起邊條筋好想食砂鍋雲吞雞，

就醒起有一次行過市廣場間牛角附近係有一間食呢類野，

稻成小館，

果次重要行過望到佢廣告主力都係sell 呢樣野食，

咁就去試下啦，

我地差不多9點去食，

見個場都係滿人，但係咁岩有檯走我地就唔洗等位，

不過就好搞笑，屯門9點其實已經過晒繁忙時間，

帶位侍應重要分開一張四人檯變做兩人檯，

最後有一位類似經理的將張檯拍返埋。

咁夜我地都唔想食太多野，

叫左個砂鍋雲吞雞，辣子雞，高力豆沙三樣。

第一道：砂鍋雞，一睇色水就知唔夠濃，飲落係味雞麵粉水。

第二道：辣子雞，我嬲到唔記得左影喇已經，雞粒同宮保雞丁一樣

第三道：高力豆沙，食落其實冇乜野，不過不失，但係都話左間野服務差，我地等左足足半個鐘有多都，原來最後比左隔離檯食埋就入左我地單。


最後: 差到我地都認同唔會再伏呢間咁ga野！

「屯門系列」Bugis@叻沙・海南雞飯 連鎖但有水準的肉骨茶店

今日又開完會，超級肚餓，

老闆帶住我二話不說去左最就近呢一間店，

不過就咁岩Lunch time 需要些少時間排隊

我自己就未食過，但老闆咁嘴刁都話ok，

咁應該就唔會差得去邊。

等位時睇下個午市餐牌，

如果照Vcity各餐廳黎計，價錢已經唔算貴，

但係計屯門黎講就係貴喇。

重有其他類型野食，

不過我一心想食肉骨茶，就叫左個午餐。

賣相色水幾好，

而且料都充足，

香港食肉骨茶，好多時候係湯頭太稀，

如果就咁飲就夠味，

我生酮唔食得飯就咁飲就岩岩好。

但係肉骨茶係用黎撈飯，咁樣就變左又唔夠味道喇。

老闆因為撈飯食就出現左咁GA情況喇。

即係個湯要再濃D先可以喇。

以連鎖店黎講係合格啦。


小食我地就另外叫左個雞翼。

個雞翼係單骨，即係一隻雞翼都要一開二咁賣😂，

喂呀，果然係連鎖。。。。

最後搭檯關係，我地望到隔壁位叫海南雞飯好似唔錯，

等我下次叫黎試下先再打多篇啦。