「屯門系列」帝樂 - 德國餐廳 King Ludwig Beerhall 泊車方便 坐位舒適

老闆早個幾兩個星期就話搵日同媽咪食飯，

個母親節飯同生日飯合併一齊食，

咁好啦講講下就冇左回事，

突然老闆醒起好似今日話係約左食飯，

問佢地突然又話全部人都話ok，

忽然之間Book 邊間食好呢，

好歹都5位食，walk in 通常都冇位。

伯友又話想食西餐，

咁兩餐夾埋食又冇理由是但 ，

諗諗下有一間好似好耐冇去響洪水橋又泊到車（呢個先係至緊要），

打去有位咁就去馬啦，其實私心係想食豬手😆。

首先叫左個大西蘭花湯：

中間有個用酸忌廉打成ga mouss，飲落去好輕身。

再黎一個大紙船小食拼盤：

有炸蝦，雞翼，腸，大堆薯條響底

配左兩種醬

咁食德國菜出左名都係食腸仔

腸仔拼盤:

我目標想食的豬手：

侍應會好識做咁成隻比我地相機食左先，

再會去旁邊細檯幫我地碎左佢。

食落去面皮係脆，內裡夠味。

以下幾樣就唔特別講了。

最後上居然係咖哩農夫包，

大家都飽晒時上呢個。。。。

反而伯友最欣賞係呢個包包，面頭炸蝦黎，

包吸左汁軟硬度剛剛好，味道都剛剛好，唔會因為比包吸左汁而變淡。

後記：

環境呢間餐廳其實元朗屯門都少有，

泊車，LIVE BAND 氣氛都好，

食物質素都唔會脫軌，咁多年都重保持到。

「屯門系列」Mos Burger新搞作摩斯芝辣漢堡

自從由元朗過左黎屯門返工之後，

我先至發現屯門真係美食沙漠黎架大佬，

又劣又貴食物真係超級多，

特別係屯市中心一帶ga 地方，

搞到我依家食來食去都係果幾間，

而我其中一間最常食ga 就係MOS Burger。

以前我未生酮基本上都係食黑醋雞漢堡，

依家改左都只係食摩斯雙層芝士漢堡，

可以比我走包之外都叫做有d野食下。

今日去食時發現左有個新包出現左

摩斯芝辣漢堡！！

我初頭以為係個醬辣，

其實係加左有煮過ga 青辣椒夾響入面，

咬到青椒先會覺得辣，

咬唔到果啖就其實同食普通芝士漢堡一樣，

叫做多一種口味可以選擇。

因為我生酮，所以我食包要飛包，

呢個係我呢最常叫法，

我就會跟沙律同咖啡，

我老闆就鐘意食佢呢隻薯條，

最後想講下，

唔知餈時開始佢呢隻沙律醬之前我好鐘意食，

依家佢轉左新包裝，

一返轉睇，簡體黎ga。。。。

之後我就連醬都冇食，淨係食沙律菜。

「燒鵝系列」深井裕記大飯店

一大早就出左荃灣開會，

個人都定係一舊雲都未識醒，

唐小姐就發板話今日想食燒鵝，

荃灣邊樹有燒鵝姐？中

有揸車我地識去搵燒鵝，

反正都係入返屯門順路一定係去深井。

廣告就由細睇到大，

其實我第一次食咋！

我地7個人叫午市套餐半隻燒鵝再加6個餸，

先至＄850大元，在我黎講覺得好抵食。

咁岩燒鵝出爐時間皮是脆的，

鵝味其實我就覺得偏淡，

要食到肥膏先覺得香口，

其他餸都好食，

差兩樣就成九大簋喇！

食飽飽唔想玩手機四圍眼望望，

望向其他檯都係單拖叫半隻燒鵝加一個菜，

咁樣食好似好開心禾，

揾日我地又要試下😂！

後記：

人頭圍返＄121左右一個人，

呢個價錢同普通飲餐茶比較都係貴少少，

重要碟碟小菜跟個湯，

服務好，上菜快靚正，

我第一次食都覺得滿意呀。

已經想下次同屋企人黎食喇😀

「元朗系列」二悅 精品台灣牛肉麵

本來落元朗本來想食吉列牛定食，

點知去到就開始落大雨，

行到門口先見到冇開就試試隔離呢間台灣牛肉麵，

賣相擺盤都靚，打卡一流

我地兩個都叫左紅燒牛肉麵，

湯是用茶壺分開上，

因為店主介紹咁樣可以試到幾種食法

1.淨係飲個湯

2.淨係試下麵，麵底已經有調味

3.想食濃味可以沾麵咁食

4.鐘意湯麵就落晒去麵度就ok

牛肉淋身但係唔夠入味，

淆多陣入味d會好d, 同偏乾身。

食食下我叮一聲覺得食落去個肉質咁似我最近新歡壓力煮出黎咁？

我一講出黎老闆就抬頭望向開放式廚房，

就同我講有一堆電子壓力煲放左響上面櫃。

哈哈，我都係食返我牛肉麵

另外重有叫左個台灣腸，

都係現成貨色，冇乜特別，。

後記：

雖然間店細細，但坐得都舒服唔覺迫，

有種坐緊響cafe 食麵感覺。

野食方面擺盤的確係精美，

不過我同老闆都認同返轉頭食ga機會唔大家，

因此元朗實在有太多間台灣麵食出食店家。

「尖沙咀系列」辣吧 Labar 超大盤烤海鮮

我老闆班fd子今日突然即興叫出黎食飯，

咁食咩好呢？

就share左呢個一大盤海鮮圖大家都話好呀好呀，

咁就訂檯，本來係打算響旺角食，

間餐廳話旺角冇位，佢就開我地尖沙咀好唔好？

我地想食就話是但啦，

分店就響美麗華隔離諾士佛臺。

其實上到去我地覺得乜咁ga，

咁冷清ga？

食8點幾但係全間野都係得兩檯，

得兩檯都唔係重點，

咁大場個要我地坐到勁迫同另外果檯要背對背坐，

落單問野又冇人介紹下，

張餐單飲品好多選擇

落完單又等左好耐又好耐，

另外在叫左小食

已經唔記得叫咩名喇，秒速食完再等左勁耐。。。。。

終於有d野睇下，比個火黎。

經過漫長等到終於都出現喇，

扇貝，貴婦蚌，聖子，蝦，蟹，魷魚。

湯就係上左檯之後先加，

有一個好ga地方就係蝦係已經去殼呢點值得一讚！！

然後食到差唔多係會愈食愈咸，

底鋪左好多白蘿蔔吸味都係覺得一般般。

後記：

講真一大班人食係開心ga，

但係如果你問我會唔會再食多一次我唔會喇。

食食下期間重見到員工響我地隔離好似響度開大食會咁，

我都驚我阻住佢地。

「荃灣系列」Cow Bean平價食扒之選

今日落荃灣睇完工廈，

順便就附近揾食，

本來想食牛角新開間牛肉飯，

泊好車行入商場是經過見到呢間Cow Bean

門口已經聞到好香，

最後見到牛角果間要等位就大家都決定返轉頭食扒。

行到入去坐底呢個天氣其實冷氣唔夠，

完全唔覺得涼快，

我地一行十幾人都有張大檯可以招呼到地食十二門徒最後的晚餐咁都ok，

牛有三個產地揀，

分200g同300g價錢都係差幾十蚊

我地分別試澳洲同紐西蘭肉眼

結論係紐西蘭好食d, 全熟都係軟嫩，牛味亦較優

我覺得幾好ga 係有迷迭香，大量炸蒜片，同一大舊香草牛油上桌

而且價錢唔貴，百零蚊花園餐廳價錢。

後記：餐廳方面其實服務不太好，店員落單都落到錯晒，但食物還境都係好ga

如果比較返個價錢，呢一間係好過花園餐廳，又未算係扒房中下檔餐廳。

「元朗系列」宏隆美食 巨形雞脾白飯任裝兩位$70有找

今日老闆唔想諗食咩，

咁我就話不如去食山下拉麵，

跟住又係去到過門而不入，

老闆唔想我又食晒d叉燒唔食麵(因為我唔食澱粉質同糖)，

驚我唔夠飽，

同埋行到去鳳琴街體育館後面條巷通常老闆都會叫去覓食家，

貪果度隻雞脾大大隻，

但係我今日唔想食果間，

隔離有間又係食雞脾，

食在元朗呢個群組都成日有人提。

間店叫宏隆美食，

其中就正正係舊覓食家鋪位，

一行入鋪就覺得好似行左入去抽風唔好ga韓燒店咁，

油煙勁到店面係煙霧彌漫，

坐底我就落單食淨雞脾，飲羅漢果茶，

老闆就叫雞脾蛋飯配黑椒汁，飲可樂。

隻脾一黎到係有驚喜佔左隻碟三份二面積，

味道方面我覺得連雞肉都有味，

老闆就覺得偏咸，

黑椒汁同蛋就冇乜特別，

另外要讚ga係店家好好招呼，

我杯羅漢果茶基本上係飲左一半就會滿返，

又會問下我地洗唔洗再添飯。

依家好少小店會咁識做。

總結:

好大隻脾！

完全係可以用黎打人，

包保牙骹軟，

老闆就覺得調味太濃食唔到雞味，

我就覺得可以雞肉唔乾有汁，

白飯任裝，羅漢果茶任添都係$70 有找！

性價比高，

唯一唔好係間鋪太大油煙，

食隻雞脾個身好似食完韓燒咁。

「元朗系列」安娜餐廳 老字號鐵板牛扒 德國豬手

老闆今日個胃想食花園餐廳級數鐵板牛扒

但係我地響屯門冇理由下下揸車出去旺角食，

咁樣出去來回車錢重貴過餐飯😂，

諗諗下唔係禾，

元朗咪有呢類型餐廳，食在元朗成日提王子餐廳。

我就問老闆好唔好，

佢話呢個係碟上唔好，要食榨榨聲果隻鐵板牛扒，

叮，元朗咪有間老字號安娜餐廳。

gogogo，食完我地重要去睇牙醫。

泊車方面餐廳出面有咪錶位，不過係極難有位

停車場就要去到千色後面先有，

成間店都係懷舊5060年代裝修，

重有呢間店係出左名上菜快，

大家樂，大快活上菜速度。

所以一坐底叫完野食就已經黎左個湯同包。

認真，我覺得呢個湯羅宋湯好好飲。

我唔想食扒就叫左豬手，都係啖啖肉之選。

呢個就係我老闆想要效果，一落汁勁大油煙。

扒又夠厚，跟本食肉獸大餐。

兩位埋單＄250左右

可以滿足晒我老闆願望，非常好。

後記：

其實我生酮之後都好常食安娜，

反而係我老闆未食過呢間咁經典ga餐廳，

食物方面講真好多餐廳都好食過佢，

元朗真係超級多餐廳可以選擇，

但係哥吃的不是食物，是情懷。

「元朗系列」屏山老地方 漢堡扒咁大塊肉餅

我地條team最近買左架同事用ga睇樓專用車
(係呀，自費架，油錢都係自己出架，D閪客成日以為公司有津貼)

咁新落地就自然想成日渣先安樂，

我個同事就問Lunch去邊食好，

咁渣車去遠D我地就由屯門過左去屏山食喇，

一班食肉獸梗係去食個肉餅飯。

泊車又方便，依家入些少有幾個專用位係for老地方泊車。

唔洗泊路邊有人睇抄牌，食食下又要渣走架車，

食都食得唔安樂。

一坐底睇下個今日推介。

umm....

睇返餐牌

都係有圖吸引d

一望就望到個六重芝士煎肉餅飯。

我老闆就叫左個松露芝士牛肝菌煎肉餅飯。

咁我行生酮都係叫走飯淨係食菜芯。

一黎到老闆見到我個肉餅老闆就嘩嘩聲，

好香呀，芝士味好勁呀，

基於隔離飯香呢個道理佢就成日覺得我果個好食D。

老闆個飯黎到我又覺得佢果個飯香過我果個😂

牛肝菌同黑松露味道都好濃，

我地其實係share 左一半個肉餅交換食。

滿足晒大家響願望😘

後記:

我食果個六重芝士真係好重口味，

好似我呢D芝士迷一定唔可以錯過，

車打同水牛芝士味道夾埋本來就已經冇得輸，

巴馬臣芝士應該都有落帶些少咸香。

老闆個肉餅芝士味就唔係好覺，

黑松露同牛肝菌味道實在太濃，

好多味道都蓋過晒，

不過兩款都係好食都係重口味必選。