「荃灣系列」Cow Bean平價食扒之選

今日落荃灣睇完工廈，

順便就附近揾食，

本來想食牛角新開間牛肉飯，

泊好車行入商場是經過見到呢間Cow Bean

門口已經聞到好香，

最後見到牛角果間要等位就大家都決定返轉頭食扒。

行到入去坐底呢個天氣其實冷氣唔夠，

完全唔覺得涼快，

我地一行十幾人都有張大檯可以招呼到地食十二門徒最後的晚餐咁都ok，

牛有三個產地揀，

分200g同300g價錢都係差幾十蚊

我地分別試澳洲同紐西蘭肉眼

結論係紐西蘭好食d, 全熟都係軟嫩，牛味亦較優

我覺得幾好ga 係有迷迭香，大量炸蒜片，同一大舊香草牛油上桌

而且價錢唔貴，百零蚊花園餐廳價錢。

後記：餐廳方面其實服務不太好，店員落單都落到錯晒，但食物還境都係好ga

如果比較返個價錢，呢一間係好過花園餐廳，又未算係扒房中下檔餐廳。

「元朗系列」宏隆美食 巨形雞脾白飯任裝兩位$70有找

今日老闆唔想諗食咩，

咁我就話不如去食山下拉麵，

跟住又係去到過門而不入，

老闆唔想我又食晒d叉燒唔食麵(因為我唔食澱粉質同糖)，

驚我唔夠飽，

同埋行到去鳳琴街體育館後面條巷通常老闆都會叫去覓食家，

貪果度隻雞脾大大隻，

但係我今日唔想食果間，

隔離有間又係食雞脾，

食在元朗呢個群組都成日有人提。

間店叫宏隆美食，

其中就正正係舊覓食家鋪位，

一行入鋪就覺得好似行左入去抽風唔好ga韓燒店咁，

油煙勁到店面係煙霧彌漫，

坐底我就落單食淨雞脾，飲羅漢果茶，

老闆就叫雞脾蛋飯配黑椒汁，飲可樂。

隻脾一黎到係有驚喜佔左隻碟三份二面積，

味道方面我覺得連雞肉都有味，

老闆就覺得偏咸，

黑椒汁同蛋就冇乜特別，

另外要讚ga係店家好好招呼，

我杯羅漢果茶基本上係飲左一半就會滿返，

又會問下我地洗唔洗再添飯。

依家好少小店會咁識做。

總結:

好大隻脾！

完全係可以用黎打人，

包保牙骹軟，

老闆就覺得調味太濃食唔到雞味，

我就覺得可以雞肉唔乾有汁，

白飯任裝，羅漢果茶任添都係$70 有找！

性價比高，

唯一唔好係間鋪太大油煙，

食隻雞脾個身好似食完韓燒咁。

「元朗系列」安娜餐廳 老字號鐵板牛扒 德國豬手

老闆今日個胃想食花園餐廳級數鐵板牛扒

但係我地響屯門冇理由下下揸車出去旺角食，

咁樣出去來回車錢重貴過餐飯😂，

諗諗下唔係禾，

元朗咪有呢類型餐廳，食在元朗成日提王子餐廳。

我就問老闆好唔好，

佢話呢個係碟上唔好，要食榨榨聲果隻鐵板牛扒，

叮，元朗咪有間老字號安娜餐廳。

gogogo，食完我地重要去睇牙醫。

泊車方面餐廳出面有咪錶位，不過係極難有位

停車場就要去到千色後面先有，

成間店都係懷舊5060年代裝修，

重有呢間店係出左名上菜快，

大家樂，大快活上菜速度。

所以一坐底叫完野食就已經黎左個湯同包。

認真，我覺得呢個湯羅宋湯好好飲。

我唔想食扒就叫左豬手，都係啖啖肉之選。

呢個就係我老闆想要效果，一落汁勁大油煙。

扒又夠厚，跟本食肉獸大餐。

兩位埋單＄250左右

可以滿足晒我老闆願望，非常好。

後記：

其實我生酮之後都好常食安娜，

反而係我老闆未食過呢間咁經典ga餐廳，

食物方面講真好多餐廳都好食過佢，

元朗真係超級多餐廳可以選擇，

但係哥吃的不是食物，是情懷。

「元朗系列」屏山老地方 漢堡扒咁大塊肉餅

我地條team最近買左架同事用ga睇樓專用車
(係呀，自費架，油錢都係自己出架，D閪客成日以為公司有津貼)

咁新落地就自然想成日渣先安樂，

我個同事就問Lunch去邊食好，

咁渣車去遠D我地就由屯門過左去屏山食喇，

一班食肉獸梗係去食個肉餅飯。

泊車又方便，依家入些少有幾個專用位係for老地方泊車。

唔洗泊路邊有人睇抄牌，食食下又要渣走架車，

食都食得唔安樂。

一坐底睇下個今日推介。

umm....

睇返餐牌

都係有圖吸引d

一望就望到個六重芝士煎肉餅飯。

我老闆就叫左個松露芝士牛肝菌煎肉餅飯。

咁我行生酮都係叫走飯淨係食菜芯。

一黎到老闆見到我個肉餅老闆就嘩嘩聲，

好香呀，芝士味好勁呀，

基於隔離飯香呢個道理佢就成日覺得我果個好食D。

老闆個飯黎到我又覺得佢果個飯香過我果個😂

牛肝菌同黑松露味道都好濃，

我地其實係share 左一半個肉餅交換食。

滿足晒大家響願望😘

後記:

我食果個六重芝士真係好重口味，

好似我呢D芝士迷一定唔可以錯過，

車打同水牛芝士味道夾埋本來就已經冇得輸，

巴馬臣芝士應該都有落帶些少咸香。

老闆個肉餅芝士味就唔係好覺，

黑松露同牛肝菌味道實在太濃，

好多味道都蓋過晒，

不過兩款都係好食都係重口味必選。

「元朗系列」牛一日式和牛火鍋放題 每款牛實測

今日放假我老闆心情特別好話想打邊爐，

通常打得邊爐都係任食先爽，

同埋上次佢食牛摩有陰影，

跟住我就介紹佢食一次牛一喇，

咁牛一我就平時食開lunch，，

食一碟牛就無限食佢d菜好岩我呢d減緊肥ga人，
(減肥重食放題！？)

講返正題先，我地食個時間就下午6點，

進入左晚餐時間，

開頭諗住唔食咁貴，食個平些少果隻和牛算啦，

響我地諗緊ga時間職員就好落力咁sell佢地個新推介限定

鹿兒島和牛

咁折實比埋加一兩位都係7百幾蚊左右，

老闆就唔洗諗一試就試下佢最貴果個plan，

牛一個任食菜果部份應該好多人講過喇，我呢度就唔長氣喇。

一坐底就會幫我地order左兩客牛，一客豬同雞。

鹿兒島牛肉入口好似食風咁，牛味唔太濃，但係油脂方面充足搭救。

另外可能我地想試新湯底關係，

叫左個蒜味噌牛乳湯，個蒜味太濃蓋過左牛味所以變相浪費左d牛。

嘆左兩三盒之後，

老闆就提議由最cheap果隻牛食起，到最貴
(因為最貴plan會包晒對落價錢ga牛肉)

得出一個結論係下次我地可以食特級日本和牛就夠喇，

因為我地就價錢，肉味，肉質都一同認為咁係性價比最高。
(所以有時唔一定最貴就最好)

和牛級別就係用白色盒上菜(以上係澳洲和牛)

上面木盒係鹿兒島和牛，下面白色盒係特級日本和牛
(老闆同我都認為性價比最高)

上面木盒依然係鹿兒島和牛，下面白色盒係極上日本和牛
(如果鐘意食油脂再重D呢隻係比較好)

經過漫長一個半小時(因為我地實在係太飽喇)，

兩個人總共食左15碟肉類。

真係食到癲左呀😂

「北上系列」再食深圳大陸探魚青椒口味淩波魚評價

對上果次食探魚先係一個月之前，

果次食完之後我地再試左元朗一間又係食烤魚ga店(詳情請見元朗烤魚工房篇)，

都係食唔返果個味道，

然後我地又睇到一個youtuber分享，

訪問過下員工問佢地覺得邊一隻味道係最好食，

話跟據呢個非正式統計係青椒味，

開頭我諗，青椒味？係咪平時食果種青色燈籠椒？

跟住原來大陸青椒係指新鮮未晒乾過ga麻椒

哦～～～～～～～

咁我當然試下啦，上次就試過最多人食有豆腐果個麻辣味道。

一上檯成兜都係青BB，

呢款就會少左放響旁邊四個角ga豆腐同埋放響底ga千張，

我地兩個細食人士就冇叫其他配菜。

不過我個無飯不歡的老闆上次芝士撈飯賣晒，今次再叫

碗飯比個魚更早黎到，

我老闆試左一啖，跟住佢冇出聲接連食左幾啖，

一見佢唔出聲食食食就知好食到爆，佢重話你睇d芝士絲。

但係明明我戒緊澱粉質，

佢個魔鬼叫我試一啖。

我拎左碗飯過黎一望，入面唔止芝士，重有吸滿豬油ga炸豬皮粒。

天呀，唔怪之得佢停唔到口。

連我都停唔到呀呀呀呀！！！！

豬油撈飯都出左名邪惡，

豬油芝士撈飯，真係聽下個名都會肥。

食評：

探魚係不嬲都會愈食愈濃味，

而呢個青椒味食落去比較清新清爽，

麻方而就同麻辣味差不多程度。

最好食都係個芝士撈飯

「Bruno」 粥底蒸汽海鮮鍋 食譜方法注意事項

平時我家粉紅Bruno成日都需要外勤，

因為我老友呀靜一路都唔肯買話多舊野阻地方，

咁就唯有辛苦我搬黎搬去(真正ga搬爐😓）

最近佢奶奶講起之前抽獎抽到一部白色，

咁就比左地用喇，拿拿林去買個深鍋，

我就淨係出個隻層蒸架，玻璃蓋都懶帶過去。

收工我地就去左荃灣楊屋道街市買海鮮，見有咩平抵食就買。

同埋一定一定一定要上二樓間牛肉檔買佢d靚肥牛，

上次試過拎黎蒸之後就返唔到轉頭喇。

連丸都可以蒸，乜都買。

呢個就係必買肥牛，真心好食，牛有牛味。

海鮮洗到乾乾淨淨。有呀靜就冇黑邊鮑😝

我地三個人食黎個擺靚靚大合照。

🔥🔥🔥🔥🔥🔥🔥🔥🔥🔥🔥開火🔥🔥🔥🔥🔥🔥🔥🔥🔥

最後我掛住食係冇影到個粥GA😂

我地三條女一共加埋食左：

鮑魚

聖子

蝦

瀨尿蝦

蟹
花甲
魚
蠔仔

肥牛

丸類

娃娃菜

菇類

南瓜

翠玉瓜

最後要講講關於用Bruno打粥底蒸氣要注意事項，

食譜就唔算得上，因為海鮮都係咁樣洗咁樣處理就放落去蒸，

如果覺得就咁蒸冇味(其實都唔會因為我都係重口味人)

就可以蒸之前加蒜蓉同少少醬油上面，或者點醬食好似打邊爐咁，

就唔會影響到個粥底。

而粥底方面，我見有人會一開始就放生米響底，暫時已經放定粥，

咁做係實會！實會！實會！痴底，因為你唔可能成日拎起個蒸架搞下個粥，

諗到都覺得麻煩啦。

我自己做法就係粥會另外煲定，煲杰身

到蒸晒海鮮喇，先至會放粥同蠔仔落去滾起就食得。

咁就快靚正喇。

「元朗系列」HEBO BBQ 私人派對場地

差不多每個月頭公司都會搞一次團隊飯，

因為上頭口味關係成日都會食中菜，

今次終於順應民意搞返次BBQ，

成班同事都係一定要嘆冷氣食飯，

所以場地必須有冷氣。

另外呢D飯聚其實醉翁之意不在食，

賭鬼們搏殺先係重點。

有張大檯，有麻雀機再加埋有得唱K。

最後就搵左呢間HEBO BBQ私人派對場地

我地一行都20幾人，

間野package 15人起計包場，

分別有A，B，C餐食物都係跟價錢執

我地食B餐為返人頭＄500蚊再加＠＄20包有人燒埋（超懶純等食plan）

B餐海鮮會多D，龍蝦，扇貝，大海蝦，倉魚，蟹，安格斯牛粒，羊架等等

冇入鏡重有腸仔魚蛋丸基本BBQ必有食物。

位置就好方便元朗尚悅對出，由元朗西鐵站行過去都係十幾分鐘左右，

如果有去過隱世山莊BBQ就會知道，因為佢其實係同一個門口入

唔好地方係因為佢方便所以就不設免費泊車，如果要泊就旁邊有爛地停車場。

呢個門口入左手邊就係。（其實係咪隱世山莊同一個老闆架?）

後記：

因為我地係懶人Plan有人幫我地燒埋，其實都燒得幾慢，

要隔好耐好耐先食到下一樣野。

同埋佢會將一種食物分兩次燒。

個感覺就好似去飲宴咁，

等到你超餓先開席然後出完一個菜又要影個相等好耐再下一個菜

個個都餓到要搶跟住到最後果幾個菜D人又飽晒剩左響度。

因為我好少見班呀太同事會搶野食XD。

BTW，海鮮類係幾好幾新鮮。

「屯門系列」BYOB Coffee Roaster 虹橋舒適cafe優質咖啡

本來已經揸車到左龍門居，

但係原來下午係冇乜野岩我食，

行左個圈我就心血來潮同老闆講，

不如我地去虹橋搵食？

咁我地就又跳上車出發，

跟住又諗起我地上次行過但係冇入到去ga 一間野，

門面望落去都好大間下，

推門入去咁岩要等一張檯，

就坐左響左手邊等位區，

等時冇野做四圍望，

發現牆上面掛左好多咖啡師證書 ，

檯與檯之間都有好多空間好闊落好有空間感。

有位坐底之後餐牌好簡單，

豬手，沙律，意粉，咖啡，茶，

今次我地試下意粉

北海道帆立貝明太子意粉
呢個係我食ga，
賣相覺得好靚有驚喜，
食落味道都有驚喜，
好creamy，
明太子好充足，每一啖都係可以食到濃濃明太子味道。
帆立貝煎到外脆內軟有牛油香味。
真心好食。

大蝦寬條麵
呢個係我老闆食，
面頭三隻蝦煎得好靚，
食落香牛油味，唔會煎過龍，
作為蝦精ga佢都覺得好正好好食。
麵都係充滿醬汁，
連佢都食得好開心。

咖啡我叫左long back。
識得欣賞ga自己會覺得好飲XD。

後記:
開頭諗住一試心態，
估唔到係有驚喜，
食物真心覺得煮得好食，足料。

「屯門系列」火水爐午餐食花膠肉餅飯

今日lunch唔想諗食咩好就走左去鋪頭後面是但食，

咁我鋪頭後面得茶餐廳，米線，雞扒，

唔係禾，有間野開左冇幾耐，

火水爐，我一路以為佢淨係晚市打邊爐先改個咁ga名，

原來佢下午時段主要係賣花膠粉麵飯。

一睇到有飯食我老闆就會話好呀，可以丫。

呢間餐廳都可以講得上係算食裝修，

入面係行5060年代許冠文風格，

門面有幅好似以前戲院門口廣告咁ga畫。

檯都都係大圓檯多，

好彩佢唔係玩摺櫈，

如果唔係就真係好似練功咁坐都屎忽都痛埋。

我就因為行低碳叫左個花膠雲吞雞湯，

我食唔出係什麼膠黎，唔知係咪煮法問題，感覺似食緊魚肚。

雲和就可以，入面係蝦多過肉，彈牙的。

湯就大路野唔係燉湯底。

我老闆就唔知點解好想食飯就試下佢個蒸肉餅飯。

黎到個樣我地唔知點解有少少打左個凸，

我影出黎好似好大兜其實我地打個凸係因為睇落去咁細咁ga？

老闆就話食落去味道可以，

但就係真係太細份就，連我個雀仔胃老闆都餵唔飽，

同檯其實重有我d同事，望落佢食果個雞脾飯好似幾好。

不過我就冇影底喇。

下次應該會想試下佢打邊爐，

因為我有時放工經過望到佢地真係有個好似火水爐咁ga野放響檯面，

件事好似好有feel禾。


後記：

lunch份量比較細，可能連女仔食都係岩岩夠飽。

味道方面偏濃味，花膠口感偏向似魚肚，

湯飲落冇粘口感，雲吞食落彈牙多蝦肉。

「開箱」夏天曬黑冬天美白，親測美白丸第一三共 White EX

日本第一三共香港唔多人識，但係日本就係一間比白兔牌更大間藥廠黎，

呢個牌子另外重有胃藥好出名，出美白丸都係日本本土人最愛，

重點係價錢亦都比白兔牌相宜好多，而且美白成分足足係三倍！！

亦都專業到出左三條美白丸line分別有：

TransinoWhite C Clear 美白丸120粒－－－速效型

Matsukiyo White EX II 美白丸180粒－－－強效型(連肝斑亦可減退)

Cystian C 維他命C美白丸210粒－－－基通型(我之前試過的確效果不大好)

精美紙盒包裝有一陣幻光，細細樽入面裝有180粒剛剛好可以食夠30日。

而美白丸通常都係食三樽為一個療程。

因為皮膚要更新都要一個過程時間去換走舊有。

所以如果想食幾日就白到發光，就唔好諗咁多喇，呵呵

正所謂美好事物都係要經過歷練同洗禮喔。

盒的另一面有講解美白丸係點樣幫我地去走黑色素，

同埋入面主要有咩成分。

維他命C 1000mg與L-Cysteine 240毫克配合，淡化黑色素，抑制生成並促進排出。 

維他命E 50mg抗氧化，清除自由基，促進血液循環。

維他命B 26mg，維他命B 612mg，促進肌膚新陳代謝。 

Cystian C 同 White EX II 的藥丸粒比較

味道左邊的食落有一陣甜美，右邊的就食落去冇味道。

食用方法 

15歲以上，每天2次，每次3粒，用水送服，飯後服用。 

不滿7歲的兒童，請不要服用。 

7歲-15歲的人群，每天服用3次，每次1粒(咁細個食黎做咩XD)

食法早3粒晚3粒，

好方使唔洗好似以前咁，

每日3餐每次2粒搞到我要帶個藥盒出街。

適合膚質暗黃，有色斑，想要美白肌膚的人群。

有痘印困擾的人群，曬黑的人。

完全係岩我食呀，年紀漸長塊面點都有幾粒班點，

所以我今次試一試呢隻升級版點下可唔可以淡化左d斑。

黎緊我會試夠三樽睇下個效果三個月後再報告。

「開箱」懶豬豬必備！大人氣！BCL Saborino 早安面膜清爽型

Saborino 早安面膜

我好早之前已經見到呢隻面膜，

不過由於我當時手頭上好多面膜未用晒又唔敢入住，

再加上我本來對一pack好多塊包裝面膜成日覺得放太耐唔好會變乾，

拖拖下到今時今日先入手。

號稱早上只需90秒一片搞掂清潔肌膚、修護滋潤和隔離底妝

上圖是底面包裝

拎上手會感覺到有個架支撐住包裝等面膜唔會受到擠壓，

我入手呢一款主要是夏季限定的薄荷葡萄柚味，清新的味道。

左上角重有賣出一億塊面膜的貼紙，證明佢受到好多女士愛戴呀（人地賣左一億塊先試）。

唔講咁多口，開黎試試。

拉汽水蓋方式去開封。

拉開後有一張保濕用透明膠紙（唔好再塞返落去呀XD）

然後就好似拔張濕紙巾咁拎塊面膜出黎。

面膜夠濕潤（比我想像中濕潤，因為一大包裝面膜除非你預先倒轉方置一陣，否則都是地心吸力令到面頭通過都偏乾）。

質地是柔軟綿質而且彈性良好（因為教學都係叫你拉扯面膜至適合面型）。

敷上面立即感到一種冰涼透爽感覺，同時清新柚子味撲鼻（同花王隻柚子味蒸氣眼罩好似XD）。

只係需要敷60秒，之後唔好一手就掉左佢呀，可以將佢摺幾下抹面。

咁樣可以將污垢去走同時有剩精華一滴都唔好放過呀。

抹完之後可以睇到張面膜紙係黃左。（本人平時係用洗面機洗面，如果平時冇乜打理ga人應該可以抹到黑色）

總結，呢款面膜好少保養同每日分秒必爭ga人用真係幾好，因為佢聲稱唔洗面就直接敷完抹面上妝，有清潔同時保濕效果。

$100一包32塊就岩岩好可以用一個月。