「屯門系列」BYOB Coffee Roaster 虹橋舒適cafe優質咖啡

本來已經揸車到左龍門居，

但係原來下午係冇乜野岩我食，

行左個圈我就心血來潮同老闆講，

不如我地去虹橋搵食？

咁我地就又跳上車出發，

跟住又諗起我地上次行過但係冇入到去ga 一間野，

門面望落去都好大間下，

推門入去咁岩要等一張檯，

就坐左響左手邊等位區，

等時冇野做四圍望，

發現牆上面掛左好多咖啡師證書 ，

檯與檯之間都有好多空間好闊落好有空間感。

有位坐底之後餐牌好簡單，

豬手，沙律，意粉，咖啡，茶，

今次我地試下意粉

北海道帆立貝明太子意粉
呢個係我食ga，
賣相覺得好靚有驚喜，
食落味道都有驚喜，
好creamy，
明太子好充足，每一啖都係可以食到濃濃明太子味道。
帆立貝煎到外脆內軟有牛油香味。
真心好食。

大蝦寬條麵
呢個係我老闆食，
面頭三隻蝦煎得好靚，
食落香牛油味，唔會煎過龍，
作為蝦精ga佢都覺得好正好好食。
麵都係充滿醬汁，
連佢都食得好開心。

咖啡我叫左long back。
識得欣賞ga自己會覺得好飲XD。

後記:
開頭諗住一試心態，
估唔到係有驚喜，
食物真心覺得煮得好食，足料。

「屯門系列」火水爐午餐食花膠肉餅飯

今日lunch唔想諗食咩好就走左去鋪頭後面是但食，

咁我鋪頭後面得茶餐廳，米線，雞扒，

唔係禾，有間野開左冇幾耐，

火水爐，我一路以為佢淨係晚市打邊爐先改個咁ga名，

原來佢下午時段主要係賣花膠粉麵飯。

一睇到有飯食我老闆就會話好呀，可以丫。

呢間餐廳都可以講得上係算食裝修，

入面係行5060年代許冠文風格，

門面有幅好似以前戲院門口廣告咁ga畫。

檯都都係大圓檯多，

好彩佢唔係玩摺櫈，

如果唔係就真係好似練功咁坐都屎忽都痛埋。

我就因為行低碳叫左個花膠雲吞雞湯，

我食唔出係什麼膠黎，唔知係咪煮法問題，感覺似食緊魚肚。

雲和就可以，入面係蝦多過肉，彈牙的。

湯就大路野唔係燉湯底。

我老闆就唔知點解好想食飯就試下佢個蒸肉餅飯。

黎到個樣我地唔知點解有少少打左個凸，

我影出黎好似好大兜其實我地打個凸係因為睇落去咁細咁ga？

老闆就話食落去味道可以，

但就係真係太細份就，連我個雀仔胃老闆都餵唔飽，

同檯其實重有我d同事，望落佢食果個雞脾飯好似幾好。

不過我就冇影底喇。

下次應該會想試下佢打邊爐，

因為我有時放工經過望到佢地真係有個好似火水爐咁ga野放響檯面，

件事好似好有feel禾。


後記：

lunch份量比較細，可能連女仔食都係岩岩夠飽。

味道方面偏濃味，花膠口感偏向似魚肚，

湯飲落冇粘口感，雲吞食落彈牙多蝦肉。

「開箱」夏天曬黑冬天美白，親測美白丸第一三共 White EX

日本第一三共香港唔多人識，但係日本就係一間比白兔牌更大間藥廠黎，

呢個牌子另外重有胃藥好出名，出美白丸都係日本本土人最愛，

重點係價錢亦都比白兔牌相宜好多，而且美白成分足足係三倍！！

亦都專業到出左三條美白丸line分別有：

TransinoWhite C Clear 美白丸120粒－－－速效型

Matsukiyo White EX II 美白丸180粒－－－強效型(連肝斑亦可減退)

Cystian C 維他命C美白丸210粒－－－基通型(我之前試過的確效果不大好)

精美紙盒包裝有一陣幻光，細細樽入面裝有180粒剛剛好可以食夠30日。

而美白丸通常都係食三樽為一個療程。

因為皮膚要更新都要一個過程時間去換走舊有。

所以如果想食幾日就白到發光，就唔好諗咁多喇，呵呵

正所謂美好事物都係要經過歷練同洗禮喔。

盒的另一面有講解美白丸係點樣幫我地去走黑色素，

同埋入面主要有咩成分。

維他命C 1000mg與L-Cysteine 240毫克配合，淡化黑色素，抑制生成並促進排出。 

維他命E 50mg抗氧化，清除自由基，促進血液循環。

維他命B 26mg，維他命B 612mg，促進肌膚新陳代謝。 

Cystian C 同 White EX II 的藥丸粒比較

味道左邊的食落有一陣甜美，右邊的就食落去冇味道。

食用方法 

15歲以上，每天2次，每次3粒，用水送服，飯後服用。 

不滿7歲的兒童，請不要服用。 

7歲-15歲的人群，每天服用3次，每次1粒(咁細個食黎做咩XD)

食法早3粒晚3粒，

好方使唔洗好似以前咁，

每日3餐每次2粒搞到我要帶個藥盒出街。

適合膚質暗黃，有色斑，想要美白肌膚的人群。

有痘印困擾的人群，曬黑的人。

完全係岩我食呀，年紀漸長塊面點都有幾粒班點，

所以我今次試一試呢隻升級版點下可唔可以淡化左d斑。

黎緊我會試夠三樽睇下個效果三個月後再報告。

「開箱」懶豬豬必備！大人氣！BCL Saborino 早安面膜清爽型

Saborino 早安面膜

我好早之前已經見到呢隻面膜，

不過由於我當時手頭上好多面膜未用晒又唔敢入住，

再加上我本來對一pack好多塊包裝面膜成日覺得放太耐唔好會變乾，

拖拖下到今時今日先入手。

號稱早上只需90秒一片搞掂清潔肌膚、修護滋潤和隔離底妝

上圖是底面包裝

拎上手會感覺到有個架支撐住包裝等面膜唔會受到擠壓，

我入手呢一款主要是夏季限定的薄荷葡萄柚味，清新的味道。

左上角重有賣出一億塊面膜的貼紙，證明佢受到好多女士愛戴呀（人地賣左一億塊先試）。

唔講咁多口，開黎試試。

拉汽水蓋方式去開封。

拉開後有一張保濕用透明膠紙（唔好再塞返落去呀XD）

然後就好似拔張濕紙巾咁拎塊面膜出黎。

面膜夠濕潤（比我想像中濕潤，因為一大包裝面膜除非你預先倒轉方置一陣，否則都是地心吸力令到面頭通過都偏乾）。

質地是柔軟綿質而且彈性良好（因為教學都係叫你拉扯面膜至適合面型）。

敷上面立即感到一種冰涼透爽感覺，同時清新柚子味撲鼻（同花王隻柚子味蒸氣眼罩好似XD）。

只係需要敷60秒，之後唔好一手就掉左佢呀，可以將佢摺幾下抹面。

咁樣可以將污垢去走同時有剩精華一滴都唔好放過呀。

抹完之後可以睇到張面膜紙係黃左。（本人平時係用洗面機洗面，如果平時冇乜打理ga人應該可以抹到黑色）

總結，呢款面膜好少保養同每日分秒必爭ga人用真係幾好，因為佢聲稱唔洗面就直接敷完抹面上妝，有清潔同時保濕效果。

$100一包32塊就岩岩好可以用一個月。

「生酮」防彈咖啡 淺談及食譜

今日想講一講生酮旅程入面ga防彈咖啡

個名就好威猛喇，

咁點解要飲呢係好多初入生酮門檻人必問

1. 初初入生酮通常都未習慣以油脂為主食，用防彈咖啡來補足
2. 防彈咖啡可以延長飽腹感令生酮朋友們冇咁易餓
3. 承上題，生酮進入中段開始進行斷食會以防彈咖啡代替早餐
4. 進食純油脂類唔會引起胰島素急升
5. 可以延長斷食時間

通常都會有人跳出黎問，我唔飲咖啡架禾咁點呀？

咖啡可以用茶或無糖可可代替，如果用於斷食就sorry，只可茶或咖啡

如果覺得苦就用赤藻糖醇或者甜菊去增加甜度，用於斷食不建議加代糖

我自己就試過用：

早餐茶(焗一陣愈濃愈好飲)

咖啡我是手調中度烘焙偏苦好飲，偏酸反而唔夾，即沖的沒試過

可可其實唔好飲，可能係我沖得唔好，有冇人沖比我飲下。。。哈哈

防彈咖啡

材料：

黑咖啡 250ml

草飼牛油 20g

椰子油 1湯匙

做法：

黑咖啡必須係熱，加落牛油同椰子油，用攪拌機(我用攪拌棒)打均，完成。👌

其實超簡單。。。。

注意係飲完6小時左右係唔需要食野

你問我點解就其實飲完係唔會餓

如果你都係餓就飲水習慣下，

飲完水都係係餓就可以食一匙椰子油。

另外如果你冇攪拌機／棒就咁用手攪兩下得唔得呀，

如果你習慣飲面頭有一浸好厚油ga湯我諗你會接受到ga

不過我肯定會鐘意飲打完latte咁ga咖啡多D。。。。

1.加落牛油同椰子油

2.用攪拌機(我用攪拌棒)打均

3.完成

成杯latte咁，其實飲落一D都唔油重好幼滑。

「生酮」飲食下的香港人

今日開多個題目就係生酮飲食心得，

香港到依家竟然都未有開始流行生酮飲食實在係太可惜喇，

呢個方法真係好好，

因為可以改善好多生體機能，

當然要戴返個頭盔啦，嚴重糖尿及臀藏有問題人仕要參考醫生意見呀。


我開始左大約一個月多d喇，

點解開始左一個月先打blog，

因為我自己都半信半疑，

生酮飲食其同我地由細到大飲食習慣黎一個大調轉

一開始真係好唔習慣

但係事實話比我知係work ga

我一個月入面體脂肪下降左足足6％

輕左10bls有多，我算係減磅最慢果一位喇

而我點解會接觸到生酮飲食呢

朋仔友有一日FB有張圖，淨係打一句5日減左磅

我心諗有冇咁神奇呀，同佢拎左幾包黎飲啦

開頭都唔知係咩黎淨係知飲落係甜ga

重要唔識戒口，大家一聽戒口唔洗驚因為生酮戒口方法真係非常爽

飲左幾日都冇輕梗係同我朋友反映啦

朋友：梗係啦！你都冇戒口，要戒晒澱粉同糖架

我：下！唔係麻，我無甜不歡架禾，咁咪好痛苦

但係我真心忍受唔到自己咁樣喇

咁戒一個星期試試先啦，戒下口又唔會死ga，係咪？

咁戒晒澱粉同糖可以食d 咩呢？

咁咪乜都食唔到？

咁咪生無可戀？

我真係好多咁。。。。



下篇講生酮可以食d咩，而我第一個星期又係點生存落去。

Bruno乳酪機 甜酒 食譜

材料：

軟飯 180g

水 100ml

米麴 100g


做法：

1. 將容器倒入水及軟飯，逐少加入米麴攪勻
2. 關好蓋子放入發酵機調教至 60度8小時 加熱
3. 8小時後取出放入雪櫃一晚，用時取出

Bruno乳酪機 葡萄酒醋食譜

材料：

白葡萄酒 150ml

穀物醋(例如白醋) 300ml


做法1：

1. 將白葡萄酒及穀物醋倒入容器攪勻
2. 關好蓋子放入發酵機調教至 50度 36小時 加熱
3. 36小時後取出放入雪櫃一晚，用時取出

Bruno乳酪機 鹽麴食譜

材料：

米麴 200g

水 260ml

鹽 60g


做法：

1. 將容器倒入水及鹽，逐少加入米麴攪勻
2. 關好蓋子放入發酵機調教至 60度6小時 加熱
3. 6小時後取出放入雪櫃一晚，用時取出

Bruno 乳酪機 醬油麴食譜

材料：

米麴 200g

豉油 250ml

水 100ml


做法：

1. 將容器倒入豉油及水，逐小加入米麴攪均
2. 關好蓋子放入發酵機調教至 60度 8小時加熱
3. 8小時後取出放入雪櫃一晚，用時取出

Bruno乳酪機 西京麵食譜

材料：

水煮大豆 130g

米麴 200g

鹽 25g


做法1：

1. 將水煮大豆以攪拌器打爛成蓉
2. 放大豆蓉入容器及加入米麴及鹽攪均
3. 放入發酵機 60度 8小時 加熱
4. 完成後放入雪櫃用時取出

Bruno乳酪機 茅屋芝士食譜

茅屋芝士

材料：

檸檬汁 15g

全脂鮮牛奶 200ml


做法：

1. 將全部材料放至室溫，之後將牛奶同檸檬汁加入容器攪拌勻
2. 關好蓋子放入發酵機調教至 65度 1小時 加熱
3. 做隔水處理(類似希臘乳酪的做法)
4. 1小時後取出放入雪櫃一晚，完成

Bruno乳酪機 酸忌廉食譜

預先將發酵器皿用熱水煮一煮佢最好，

最懶都要用滾水去過一過，咁樣係為左殺菌同確保乾淨。

材料：

原味乳酪 75g

淡忌廉 200ml


做法2：

1. 將全部材料放至室溫，之後將淡忌廉同乳酪加入容器攪拌勻
2. 關好蓋子放入發酵機調教至 43度6小時 加熱
3. 6小時後取出放入雪櫃一晚，完成

用法：

可以配搭很多煎炸食物使用減低油膩的感覺例如有名的炸魚薯條

另外很多糕點例如芝士蛋糕都有使用到酸忌廉，也可以用來塗上多士鬆餅上使用

因為酸之中亦會帶來豐富的奶香口感，代替牛油是不錯的選擇喔

而自家制的酸忌廉亦可對糖的控制更好，因為市面上買的都加了很多穩定劑等添加

而我在進行生酮飲食的人是很好的呢